پاکستان: امت مسلمہ کو حکمرانوں کی پروا کئے بنا اسرائیل کیخلاف اٹھ کھڑا ہونا ہوگا، فضل الرحمٰن

اہل بیت(ع) نیوز ایجنسی ـ ابنا ـ کے مطابق، جمعیت علمائے اسلام کے سربراہ مولانا فضل الرحمٰن نے کہا ہے کہ اسرائیل کو تسلیم کرنے ، یا اس کے ساتھ سیاسی یا معاشی تعلقات قائم کرنے کی کوشش کرنے والوں کی ٹانگیں توڑ دی جائیں گی۔ 
انہوں نے کہا: اسرائیلی وزیر اعظم کو عالمی عدالت انصاف نے جنگی مجرم قرار دیا ہے، ہمارا مطالبہ ہے کہ اسے پھانسی دی جائے۔ 
ان کا کہنا تھا کہ غزہ کے مسلمانوں کی اخلاقی ، سفارتی اور ہر طرح کی امداد ہم سب پر فرض ہے، اسرائیل کے حوالے سے بانی پاکستان قائد اعظم محمد علی جناح اور قیام پاکستان کا واضح موقف ہے کہ اسرائیل ایک ناجائز ریاست ہے اور کسی کو ان کے اس موقف سے رو گردانی کی اجازت نہیں دی جائے گی۔
انہوں نے مزید کہا کہ علمائے کرام نے مجلس اتحاد امت کے پلیٹ فارم سے جہاد کا جو فتویٰ دیا ہے، ہم سب اس کی تائید کرتے ہیں۔ 
ان خیالات کا اظہار انہوں نے اتوار کی شب شاہراہ قائدین پر جمعیت علمائے اسلام کے تحت اسرائیل مردہ باد ملین مارچ سے خطاب کرتے ہوئے کیا۔ 
ملین مارچ سے جمعیت علمائے اسلام سندھ کے مرکزی اور سندھ کے صوبائی عہدیداروں نے بھی خطاب کیا۔ 
مولانا فضل الرحمن کے اسٹیج پر آنے پر ان کا فقیدالمثال استقبال کیا گیا؛ شرکاء نے ہاتھوں میں فلسطین کے پرچم اٹھا رکھے تھے، شرکاء نے اسرائیل مردہ باد اور فلسطین کی حمایت میں نعرے لگائے۔ 
مولانا فضل الرحمن کی آمد پر انہیں فلسطینی پرچم پہنایا گیا ۔ 
مولانا فضل الرحمٰن نے ملین مارچ سے خطاب کرتے ہوئے کہا کہ آج کے اجتماع نے اہل عرب اور غزہ کو حوصلہ دیا ہے؛ فلسطینی عوام تنہا نہیں ہیں؛ ہم خون کے آخری قطرے تک ان کے ساتھ ہیں۔ 
انہوں نے کہا کہ مسلمان حکمران اپنی غیرت کا مظاہرہ کریں اور فلسطینیوں کی مدد کریں۔ 
ان کا کہنا تھا کہ آج کراچی کے ایک ملین عوام آپ کو آپ [مسلم حکمرانوں] کو بیدار کرنے کی کوشش کر رہے ہیں، آپ اپنا فرض پورا کرکے غزہ کی مدد کریں۔
فضل الرحمٰن کا کہنا تھا کہ  60 ہزار سے زائد فلسطینیوں کو شہید کیا گیا ہے جن میں غالب اکثریت خواتین اور بچوں کی ہے، لیکن اسلامی ممالک کے حکمران امریکہ کے پٹھو بن چکے ہیں، وہ اسرائیل کی غلامی کر رہے ہیں ۔ 
انہوں نے کہا: آج سب کو اٹھ کھڑا ہونا ہو گا اور اسرائیل کی جارحیت کو روکنا ہو گا ، اسرائیل کوئی ملک نہیں ۔ اس نے فلسطین پر قبضہ کیا ہوا ہے اور اس قبضے کو 77 سال ہو گئے ہیں ۔ عالمی قوتیں ایک ایسے عمل میں اسرائیل کو حمایت اور تائید دے رہے ہیں ، جس کی کوئی قانونی حیثیت نہیں ہے، ایک صدی پہلے تک کرہ ارض پر اسرائیل نام کی کوئی ریاست نہیں تھی ۔
۔۔۔۔۔۔۔۔۔۔۔۔
110